Saameynta uu Reebay Qaraxii Xalay Maqribkii ka Dhacay Muqdisho ayaa waxaa weli bur bur aad u xooganu uu ka muuqdaa goobtii uu qaraxa ka dhacay ee Isgoyska Jubba, kaasi oo ah meel ku dhaw Hotelka Dorpin ee Magaalada Muqdisho.
Dad badan oo shacab ah ayaa xalay ku geeriyooday qaraxaasi, waana meesha dowladda ay sheegtay khasaaraha ugu badan ee shacabka inuu ka dhashay, maadaama dad badan halkaasi ay maraayeen.
Wasiirka amniga dalka Soomaaliya, Maxamed Abuukar Islow (Ducaale) ayaa sheegay dad shacab ah oo qaarkood ka yimid dhanka Liido ,kuwaasi oo goobta qaraxa ka dhacay maraayay xilligii uu weerarku bilaawday, kuwaasina ay yihiin kuwa ugu badan ee qasaaruhu uu soo gaaray.
Suxufiyiinta oo saaka booqday goobtii ay wax ka dhaceen ayaa waxa ay soo arkeen bur burka dhismayaal badan oo qaraxa uu saameeyay, maadaama qaraxa gaariga loo adeegsaday uu ahaa mid culus.
Wali si rasmi ah looma oga inta uu la’eeg yahay khasaaraha rasmiga ah ee dhimashada iyo dhaawaca ka dhashay gaarigii koowaad ee ku qarxay nawaaxiga Isgoyska KM0.
