Saaka ayaa lagu waddaa in magaalada Addis Ababa ee caasimadda dalka Itoobiya, uu ka furmo Shir Madaxeedka Caadiga ah ee ururka Midowga Afrika, iyadoona Shirkaasi uu ka qayb galayo Madaxweynaha Soomaaliya oo hadda ku sugan caasimadda dalkaasi.
Shirkan oo ah kii 30-aad ee Madaxda Afrika isugu yimaaddaan ayaa socon doona muddo laba maalmood ah, waxaana sanadkaan looga hadli doonaa xoojinta dagaalka lagula jiro musuqmaasuqa oo ay hoggaamiyeyaasha Afrika si wadajir ah uga shaqeyn doonaan.
Shirkaasi ayaa sidoo kale lagu casuumay madaxweynaha Falastiin Maxamuud Cabaas Abuumaasin oo halkaasi ka jeedin doona khudbad la xiriirta arrimaha Falastiin,isagoo sidoo kale soo bandhigi doona aragtidiisa ku aadan go’aankii madaxweyne Trump ee Qudus.
Madaxda Afrika ayaa sidoo kale lagu waddaa in ay yeeshaan kulamo gooni gooni ah oo looga hadlaayo xaaladda Afrika, Madaxweyne farmaajo ayaa inta uu ku sugan yahay dalka Itoobiya waxa uu kulan la qaadan doonaa madax kala duwan.
