April 09, 2017 – Madaxweynaha dowladda federaalka ee Soomaaliya mudane, Maxamed C/llaahi Farmaajo iyo Wafdi balaaran ee uu hogaaminayo ayaa Galabta u dhoofay wadanka Isutagga Imaaraadka Carabta, waxaana garoonka diyaaradaha ee Muqdisho ku sii sagootiyay Madax ka tirsan Dowladda Federaalka.
Madaxweynaha Farmaajo ayaa la filayaa inuu dalka Imaaraadka kula kulmo Madaxda Wadankaasi, kuwaasi oo uu kala hadli doono Arrimo ay ka mid yihiin, Muranka ka dhashay Saldhigga Milatari ee Imaaraadka Carabta uu ka dhisanayo Dekedda magaalada Berbera.
Baarlamaanka federaalka ee Soomaaliya ayaa waxaa iminka horyaalla Mooshin ka dhan ah Heshiiska Somaliland ay la gashay Dowladda Imaaraadka Carabta, kaas oo dhigaya in magaalada Berbera ay dowladda Imaaraadka ka dhisan karto saldhigga Milatari oo ay ka howlgalaan diyaaradaheeda dagaalka ee Imaaraadka.
