July 12, 2016 – Diyaarad Drone oo ah nooca wax basaasa ah oo aan hore loogu arag nooceeda ayaa galabnimadii shalay kusoo dhacday xaafadda 1-da Maajo ee Degmada Waaberi ee Bartamaha Magaalada Muqdisho
Taliyaha Saldhiga Booliska Degmada Waaberi, Xuseen Maxamed Cabdi iyo ciidan uu horkacaayay oo gaaray halkii ay ku soo dhacday diyaarada ayaa muddo raadinayay iyadoo la sheegay inuu xareystay nin ka ag dhowaa goobta ay ku soo dhacday oo markii danbe laga soo qaaday.
Diyaaradan oo qaab Shimbir weyn u sameysan ayaa waxaa sheegtay inay leeyihiin ciidamada Nabadsugidda Soomaaliyeed ee NISA, waxaana saldhiga Waaberi ka qaatay sarkaal ka tirsan NISA.
Waa markii ugu horeysay ee NISA ay sheegato inay adeegsato diyaaradaha Drones-ka ee wax basaasa.
